خانه > * شعر کرمانجی - Helbestên Kurmancî > Hest, raman, helbest û pênûsa Aras Hiso

Hest, raman, helbest û pênûsa Aras Hiso

Hest û helbest û pênûsa Aras HisoAras Hiso (آراس حسو) xortekî kurd ê ۱۸ salî ji bajarê pîroz û berxwedêr ê Kobanê ye. Ew bi zarxweşî û hest û hisên xwe û bi pênûsa xwe ya rewan, jiyan, evîn, êş û hêviyan bi hev ra dilorîne. Hest û helbestên Aras Hiso bi kurmanciyeka xwerû û şirîn û bi rastî kûr û ji dil in. Ramanên di nav nivîsên Aras da herî zêde bêhna kurdîtiyê didin û her kurdek li her derê vê êş, evîn, hêvî û hesta hevpar his dike. Çendîn nivîs û helbest û pexşanên wî li ber destê me hene. Em li vir çend helbestên birêz Aras Hiso bo cara yekem diweşînin û li pêşerojê jî bere bere ji helbest û pexşanên wî pêşkêşî we dikin.

Hêjayî gotinê ye ku Aras di van salên dawî da çi berî êrîşa li ser Kobanê û çi piştî vê êrîşê û vegeriyana xwelkê ya bajêr wek bêjer li radyoya herêmî ya vî bajarî dixebite. Her wiha wî wek wek mamotsayê zimanê kurdî çend mehan di kwînên penaberan da zimanê kurdî hînî zarokan kir.

B. Q

***

***

***

Hest û helbest û pênûsa Aras Hiso

Aras Hiso – Kobanê

ÇAVXEZALÊ!… Min dixwest mûzîk min li ser rîtma xeyala te lêbide tenê fêm bikim ew xeyalên razayî.... Tu....Tu.... ...Tu di xewnên şevgermî de bi şermiya stêrkan re melevaniyî dikî. Ma wê kî şiyar bibe?!...... Nikarim êdî çavan mist bidim bi tîrêjên rûkeniya te ji ber korbûna çavên westiyayî.. Nikarim bimeşim ji ber tunebûna lingê min.. Nikarim hêviyan di wargeha xeyalan de bihûnim ji ber tunebûna hestên min hestên ku her şev xwe li taldeya siya de Xewnên şevan dilûrîne...... Piştre wenda dibe, wenda dibe.

ÇAVXEZALÊ!…
Min dixwest mûzîka min li ser rîtma xeyala te lêbide tenê fêm bikim ew xeyalên razayî….
Tu….Tu…. …Tu di xewnên şevgermî de bi şermiya stêrkan re melevaniyî dikî.
Ma wê kî şiyar bibe?!……
Nikarim êdî çavan mist bidim bi tîrêjên rûkeniya te ji ber korbûna çavên westiyayî..
Nikarim bimeşim ji ber tunebûna lingê min..
Nikarim hêviyan di wargeha xeyalan de bihûnim ji ber tunebûna hestên min
hestên ku her şev xwe li taldeya siya de
Xewnên şevan dilûrîne……
Piştre wenda dibe, wenda dibe.

***

Çîrokek nivîsand

Çîrokek nivîsand
lê ji xwendinê hez nedikir
her berêvarê dihat vê koşeyê
ji temenê xwendinê
tenê çîroka xwe dixwend
pir ji çîroka xwe hez kir û da ber çapê
ji berhema pelên payîzê weşand
tenê ew xwendevanê çîroka xwe bû
her şev jê dixwend
êdî jê aciz bû, pirtûka xwe şewitand
Û xwe jê rihet kir…

***

***

Bêrîkirina dilê min…
Ji bêrîkirna te bêriya xwe di dilê te de dipêçim
Hevala hestên min..
Hevala ku di xewnên min te dibî stargeha veşarokên min
Ji kurkura bêrîkirinê di zîndana dilê xwe de…
Kenê te dikim muzexane û çavên kobaniyê de
Ji teşbîha rengên dêmên te di lîlava rondikên zarokan de buyax dikim
Ji çavên cîhanê yên serqot re..
Te dikim pêşangeh ji welatên bê xwedî re
Ji ber bêrîkirina xwe yên tûûûûûjjjjj!…
bi qasî rondikên li ser her cure gulên çiyayê kurdistanê
Ji te hez dikim hevala BÎRANÎNAN!…

***

Kenê ku ji rengê dêman nuqutî...

Kenê ku ji rengê dêman nuqutî…
xemgînî lerizand li ser lêvên şkestî
hemû damarên ruh qetiyan
ji kenê rêçên te…
Tizibiya ji morîkên çavên te
di wargeha dawa dilê min de
her yek bi derekê ket
her yek bû rengek
nizam bi ku de çû
nizam
lê çû…

***

Keziyên reşmarî bi ser dêmên soromorî de hate xwarê...

Keziyên reşmarî bi ser dêmên soromorî de hate xwarê…
Zerîpenga şevê!..
xewnên kadizî ji şerma lêvên te hat daqurtandin
Na, na li ser çîrokê nehat girtin
lê di qirika evîndaran de jan dida
Wey EVÎNPEREST!,

***

MIN DIXWEST

MIN DIXWEST

Min dixwest kenekî ji evîngeha te li xwe bar bikim.
Min dixwest gulekê ji gulistana buhara te di dilê xwe de biçînim.
Min dixwest xêzekê li bijangên çavên bûkekê kil bikim
Min dixwest avekê li germahiya kezeba dayîka xwe sar bikim
Min dixwest pêlek min li rondikên çavên te bide
Min dixwest peyvekê ji rengê hevokên te binivîsim
Min dixwest îşev bibim mêvanê gazinên xwe
Min dixwest wekî bilûrvanekî li ber guhên te bilûrînim
Min dixwrst ji hestên tîr dengbêjan li hev rakim qerezan
Min dixwest helbesta dawî ji bermahiya hestên xwe ava bikim
Min dixwest tenê gotina dawî ji birîna qirika xwe derînim
Min dixwest xwesteka min bi cih were
Min dixwest û dixwest û dixwest û dixwest… dixwest…..
lê nebû
nebû…

***

Vê şevê min nekarî tiştekî binivîsim

Vê şevê min nekarî tiştekî binivîsim
Ne nivîs û ne jî gotin têra dermankirina birîna hestên min nakin…
yê dizane dizane lê ez na!
Her ku nivîsên min diwerime… reş dibe… mezin dibe, vê re diêşe. Êdî gotin di qirika min de jan didin û roj bi roj dibe kuleke mezin, heke rojekê bi min de teqiya, xwe bidin aliyekî bila nebe bela serê we!

***

ZAROKEKÎ BIRÇIYÊ XEYALAN IM

***

ZAROKEKÎ BIRÇIYÊ XEYALAN IM
………………………………………………….
Zarokekî sêwî me, tenê sêwî me, sêwiyê xeyalên xwe me.
Her şev dixwazin qirêja xwe bi rûkeniya dêmên min paqij bikin.
Ma gunehê we bi min nayê?!
Ku hûn lêstûka xeyalên min ya ku ez her roj pê şa dibim her şev werin ji hembêza dayîka min birevînin. Ma ne bese we ez di her carên xwe de birîn kirim, we çavên min ji rûyê vê dunyayê bê par kirim.
Xewa min tê ye dayê …
Ez ditirsim ku di xew de werin min û hemû xeyalên ku ez pê şa dibim ji nava hembêza te birevînin û min ji ramûsandina reşkiya çavên te bê par bihêlin. Ez ditirsim … ez ditirsim ku hezkirima min ji te re li gel xwe hêsîr bigrin dayê!…
Xweziya dayê xweziya …
Xweziya ez îşev di hembêza te de bi her du dest û linhê xwe binixumandama û ji nav bêhna keziên te têrnebûma. Xweziya ez di hembêza ted e bigriyama, bikeniyama û ji sêfûniya çîroka te têrnebûma. Dayîka min e zarşêrîn, ez dizanim tu niha digrî ye kanî negrî bese hestên dilê neperitîne. Ez ne sêwiyê te me. Ez ez sêwiyê jiyana baskokirî me. Ez dizanim ku tu êşên nefesa dilê min hîs dikî ji ber ku ez di kelekela kezeba te de jiyan dikim. Ez dizanim ku tu dizanî ez niha bê xas im, birçî, tî, tazî û di seqemoka zivistana bê bext de li kolanên xerîbiyê diricifim.
Wey dayîka min!…
Ev ji min re ne xem e lê ez birçiyê hezkirinê me, dixwazim hez bikin
ji te û hezkirina jiyanê bifirim
Dayê, dayîka xewna min
ka bihêle ez îşev raz im, êdî xwe ji xewnên min bavêje.

***

Ez dîn im

Ez dîn im

Mirov dîn e
Jiyan dîn e
jan dîn e
Ezman dîn e
Hawirdor dîn e
Ewr dîn e
Stêrk dîn e
Kul dîn e
Şev dîn e
Tarî dîn e
Giyan dîn e
Cîhan dîn e
Tenê dîn ne dîn e!!!.

***

..,..,..,..,..,..,...EZ DIÇIM...,..,..,..,..,...

..,..,..,..,..,..,…EZ DIÇIM…,..,..,..,..,…

Û diçiiiiiiiiiim ji kerba eşqa te!…
Ez diçim û pişta min li xerîbiya dûrbûna te ye. Çûyîna bi her gaveke êşiyayî xwe li tenîtiya xeyalên min ya bê veger bar dike.
Niha pişta min li te ye û li ser deşta rêwîtiya dilopên xeyalan li zeviya eşqa xwe belav dikim.
belkî tovên vegera çavên te lê were çandin, belkî bibim cotkarê berhevkarê keziyên te.
Belkî em hev nebînin…
Tu dizanî ku peyva çûyînê min diêşîne?
Bi saetên şevên dirêêêêêêêêêj tayên spî ji poreşiya xortaniya min e sexte zêde dikî.
Ku çûyîn min bi awirên xurbetiyê nexwe
Ez ê li deryayê bûkaniya çavên te rast werim
An jî tu yê nedîtina min e veşartî, rûyên min e kelepçekirî, zimanê sotî, hestên mirî, janên qelaştî û hêviyên min e baskokirî di wendahiya belavbûyîna min de bibînî.
Lê ez dizanim ez nayêm bîra te
Heke ez hatim bîra te, heke xatirê ji kulbûyî li gel te mabe, tenê xwestekekê ji te dixwazim ew jî xeyalên min e veşartî li wargeha dilê hevalên xwe biçîne
Min nedît bila ew bibînin.
Belkî roj, dem, dewran û salên dom û dirêj bizîvire
belkî bibim meyweyek ji wê darê
Ma ez ê nebim para zarokekî birçî jî?
biborîne min tu aciz kirî, niha bi xatirê te ez naxwazim li te dirêj bikim ji ber ku gotinên min westiyan e. Û peyvên xatirxwestinê pir bi êş in ji bo wê ez ê bê dîtina te biçim.
Bibore ez nikarim li te dirêj bikim. Niha otobîs li benda kulên min e ku li xwe bar bike. Ji hemû hevalhezan re silav. Bi xatirê te. Bi xatirê. Bi xa… bi x…. b x… xx…x….

***

MIRINA BÊ SEDEM

MIRINA BÊ SEDEM

Tenê li benda mirina min bin
ew mirina ku min diêşîne..
Û bi bexteweriya xwe şa dibe.
Na, ne ji ber tirsa te.. ne ji ber reva eşqa te …
Ji ber ew kulên ku di agirê janên min de geş dibe
ez tenê ditirisim ku mirin jî min bikuje…
Mirinkuja jiyana bêbext!
çaxa ku min xwe nas kir ez mirov im, mirinê bi awirên xweyî tûj li pey min ket.. tenê xwest min ji evîna sêwî bêpar bihêle.
Gava ku ez mirim…
Bila hawara te li ber devê bêbextan neyê û nebêje:
-çima filan kes kurê filan kes mir?!…

***

ZAROK İM

ZAROK İM
Ji ber ku ez zarok im
dibim pêşangeha çavên te kobaniya min!…
ji ber ez zarokê di taldeya avahiya hilweşiyayî de razayî me
dibim xeyalek ji firînên hêviyên xwe…
raste, ji tunebûnê dibim hebûna we Zarokno!!!…
ez jî dixwazim bibim rengek di çavên mamosteyan de
ji ber ez şagirtê dibistana şehîd Berfîn im
ez jî lêstûka xwe diyarî çavên zarokên sêwî dikim

***

Ez dibim tevna evîna te.

Ez dibim tevna evîna te.
Tu jî roj bi roj neqşekê li dêmên rûkeniya min û xwe!…
di paxila dilê xwe de dirêsînî
ji xemla zozanên biharê
dibim rengek…
ji awaza kenê te…
sorgulê…

Didome …

Aras Hiso

  1. Ebas Ferhadî Topkanlû
    ۲۷ اردیبهشت ۱۳۹۴ در ۱۳:۱۰ | #1

    Dembaş
    Hevalê Aras bijî bira, Kobanê numad û sembolê berxwedan e. Lê Kobanê wek navê, dîsa navê berevaniya Kurd li hember stemkarî anî ser zimîn, wek kurdên li Xorasanê ku li hember Urus û Tirkmen û Uzbek sekinîn, Wek Dêrsim û … Ez ji xwendina nivîsên te şa û serfiraz bûm, êşa te êşa me ye jî
    Li benda nivîsên te

  2. ناشناس
    ۲۷ اردیبهشت ۱۳۹۴ در ۱۱:۴۶ | #2

    Hevalê min yê hêja ez te pir spas dikim, ev êş û hîsên welatê me yê me hemûyan. hêviya me ew e ku her xortekî kurd bi pênûsa xwe pêşengtiyê ji ji ax û welatê xwe re bike. zor spas ji bo te û heznivîsên kurd.

  3. ۲۷ اردیبهشت ۱۳۹۴ در ۰۹:۵۱ | #3

    Silav û destxweş kekê Berat
    Bi rastî Aras ji wan kêm xortên kurd e ku tem û bêhna helbest û hestên kurdînîyê ji helbestên wî tê.